സുശാന്ത് സിംഗ് രജ്പുതിന്‍റെ അവസാന ചിത്രം ദിൽ ബേച്ചര ഓണ്‍ലൈന്‍ പ്ലാറ്റ്ഫോമായ ഡിസ്നി ഹോട്ട്സ്റ്റാറിൽ റിലീസ് ചെയ്യും. ജൂലൈ 24നാണ് ചിത്രം റിലീസ് ചെയ്യുക. ദി ഫോൾട്ട് ഇൻ ഔവർ സ്റ്റാർസിന്‍റെ ബോളിവുഡ് റീമേക്കായ ചിത്രം ബോളിവുഡിലെ ഏറ്റവും ശ്രദ്ധേയനായ കാസ്റ്റിംഗ് ഡയറക്ടർ മുകേഷ് ഛാബ്രയാണ് സംവിധാനം ചെയ്തിരിക്കുന്നത്. സഞ്ജന സംഗി, സൈഫ് അലി ഖാന്‍ എന്നിവരും ചിത്രത്തില്‍ പ്രധാന വേഷങ്ങളില്‍ എത്തുന്നുണ്ട്. സഞ്ജന സംഗിയുടെ ആദ്യ ചിത്രമാണ് ദിൽ ബേച്ചര. ചിത്രത്തിന്‍റെ സംഗീത സംവിധാനം എ.ആർ. റഹ്മാനാണ് നിര്‍വ്വഹിച്ചിരിക്കുന്നത്. ഡിസ്നി ഹോട്ട് സ്റ്റാര്‍ സബ്സ്ക്രൈബേഴ്സിനും അല്ലാത്തവര്‍ക്കും സിനിമ ലഭ്യമാക്കുമെന്ന് ഡിസ്നി ഹോട്ട്സ്റ്റാര്‍ അധികൃതര്‍ അറിയിച്ചു. ഫോക്സ് സ്റ്റാര്‍ സ്റ്റുഡിയോസ് ആണ് നിര്‍മാണം.
ഇക്കഴിഞ്ഞ ജൂണ്‍ 14നാണ് ബോളിവുഡ് താരം സുശാന്ത് സിംഗ് രജ്പുതിനെ മുംബൈ ബാന്ദ്രയിലെ വീട്ടില്‍ തൂങ്ങിമരിച്ച നിലയില്‍ കണ്ടെത്തുന്നത്. വിഷാദരോഗിയായിരുന്നു സുശാന്ത് എന്നും ആറു മാസമായി ചികിത്സയിലായിരുന്നുവെന്നും റിപ്പോര്‍ട്ടുകളും പുറത്തുവന്നിരുന്നു. ബോളിവുഡില്‍ നിന്നുള്ള അവഗണനയും സിനിമകള്‍ മുടങ്ങിയതുമാണ് സുശാന്തിനെ വിഷാദ രോഗിയാക്കിയതെന്നാണ് ആരോപണം. സുശാന്തിന്‍റെ അഞ്ച് സിനിമകള്‍ മുടങ്ങിപ്പോയെന്നും റിപ്പോര്‍ട്ടുണ്ട്. കുറച്ച് വര്‍ഷങ്ങളായി സുശാന്ത് പ്രശ്നങ്ങളിലൂടെയാണ് കടന്നുപോയിരുന്നതെന്ന് സഹപ്രവര്‍ത്തകയും ഹെയര്‍ സ്റ്റൈലിസ്റ്റുമായ സ്വപ്ന ഭവാനി വെളിപ്പെടുത്തുകയും ചെയ്തിരുന്നു. സുശാന്തിന്‍റെ കഴിവിനെ ബോളിവുഡ് അംഗീകരിച്ചിരുന്നില്ലെന്ന് നടി കങ്കണ റണാവത്ത് പറഞ്ഞിരുന്നു. ഇതിന് തൊട്ടുപിന്നാലെ ബോളിവുഡില്‍ അലയടിച്ച വിവാദങ്ങള്‍ ഇത് വരെയും അവസാനിച്ചിട്ടില്ല.
