ലോകത്തെ ആശങ്കയിലാഴ്ത്തി കൊവിഡ് 19 വ്യാപനത്തിന്റെ പശ്ചാത്തലത്തില്‍ പൗരന്മാര്‍ക്ക് മാര്‍ഗ്ഗ നിര്‍ദ്ദേശങ്ങളുമായി പ്രധാനമന്ത്രി നരേന്ദ്ര മോദി. അതിന്റെ ഭാഗമായി മാര്‍ച്ച് 22 ഞായറാഴ്ച ജനതാ കര്‍ഫ്യു ആചരിക്കാന്‍ പ്രധാനമന്ത്രി നിര്‍ദ്ദേശിച്ചു.
- എന്താണ് ജനതാ കര്‍ഫ്യൂ ?
കൊവിഡ് 19 വൈറസ് ബാധയുടെ അടിസ്ഥാനത്തില്‍ പ്രധാനമന്ത്രി മുന്നോട്ട് വച്ച നിര്‍ദ്ദേശമാണ് ജനതാ കര്‍ഫ്യു. ഈ സമയത്ത് രാജ്യത്ത് ആരും പുറത്തിറങ്ങരുതെന്നാണ് പ്രധാനമന്ത്രി നിര്‍ദ്ദേശിച്ചിരിക്കുന്നത്. റോഡുകളിലേക്കോ പൊതുസ്ഥലങ്ങളിലേക്കോ ആളുകള്‍ ഇറങ്ങുന്നത് കുറയ്ക്കണമെന്നാണ് പ്രധാനമന്ത്രി ജനങ്ങളെ അഭിസംബോധന ചെയ്ത്പറഞ്ഞത്. - എപ്പോഴാണ് ജനതാ കര്‍ഫ്യൂ ആരംഭിക്കുന്നത് ?
മാര്‍ച്ച് 22 ഞായറാഴ്ച രാവിലെ 7 മണി മുതല്‍ രാത്രി 9 മണി വരെയാണ് കര്‍ഫ്യു. ഈ സമയത്ത് ആരും വീടിന് പുറത്ത് ഇറങ്ങരുതെനന്നാണ് പ്രധാനമന്ത്രി നിര്‍ദ്ദേശിച്ചിരിക്കുന്നത്. - ജനതാ കര്‍ഫ്യൂവില്‍ ഇളവ് ആ‍ർക്കൊക്കെ ?
സ്വന്തം ആരോഗ്യം സംരക്ഷിക്കുവാനും മറ്റുള്ളവരിലേക്ക് പകര്‍ത്താതിരിക്കുന്നതിനും വേണ്ടിയാണ് ഇത്തരത്തില്‍ നിര്‍ദ്ദേശം പ്രധാനമന്ത്രി മുന്നോട്ട് വച്ചിരിക്കുന്നത്. ഇതില്‍ എല്ലാവരും പങ്കെടുക്കണമെന്നാണ് അദ്ദേഹം അഭ്യര്‍ത്ഥിച്ചിട്ടുണ്ട്. ഇതില്‍ അവശ്യ സർവീസുകളായ പൊലീസ്, ആരോഗ്യ സംഘങ്ങള്‍, മാധ്യമങ്ങള്‍, അഗ്നിശമന സേന എന്നിവര്‍ക്കാണ് ഇളവ് നല്‍കിയിരിക്കുന്നത്. - കൊറോണയുടെ പശ്ചാത്തലത്തില്‍ പ്രധാനമന്ത്രിയുടെ നിര്‍ദ്ദേശങ്ങള്‍ എന്തെല്ലാം ?
കൊറോണയില്‍ നിന്നും രക്ഷപെടാന്‍ പൗരന്മാരുടെ കുറച്ച് ദിവസങ്ങള്‍ രാജ്യത്തിന് വേണ്ടി നല്‍കണമെന്ന് പ്രധാനമന്ത്രി പറഞ്ഞു. 65 വയസ്സില്‍ അധികം പ്രായമുള്ള ആളുകള്‍ സ്വന്തം വീട്ടില്‍ തന്നെ തങ്ങണം. ആള്‍ക്കൂട്ടങ്ങള്‍ പൂർണമായും ഒഴിവാക്കണം. കൊറോണയെ ആരും ലാഘവ ബുദ്ധിയോടെ സമീപിക്കരുതെന്നും അദ്ദേഹം പറഞ്ഞു. സ്വയം ശ്രദ്ധിക്കുന്നതോടൊപ്പം മറ്റുള്ളവരുടെ ആരോഗ്യം കൂടി ശ്രദ്ധിക്കണം. കൊറോണ വൈറസ് നിന്ന് രക്ഷപ്പെടാനുള്ള മരുന്നോ വാക്സിനോ ലോകത്ത് ഇതുവരെ കണ്ടുപിടിച്ചിട്ടില്ലെന്നും പ്രധാനമന്ത്രി പറഞ്ഞു.
