അഞ്ചല്‍: കൊല്ലം അഞ്ചലില്‍ ഇടമുളയ്ക്കലില്‍ ഭാര്യയേയും ഭര്‍ത്താവിനേയും വാടകവീട്ടില്‍ മരിച്ച നിലയില്‍ കണ്ടെത്തി. ഇടമുളയ്ക്കല്‍ അമൃത് ഭവനില്‍ സുനില്‍ (34), ഭാര്യ സുജിനി (24) എന്നിവരാണ് മരിച്ചത്. അമ്മയും അച്ഛനും വിടപറഞ്ഞതറിയാതെ മാതാവിന്റെ മൃതദേഹത്തില്‍ മുലപ്പാല്‍ നുണഞ്ഞ് മൂന്നുവയസ്സുകാരി അശ്വതി നില്‍ക്കുന്ന കണ്ണീര്‍ക്കാഴ്ചയോടെയാണ് സംഭവം ആളുകളറിയുന്നത്.
വീടിന്റെ കഴുക്കോലില്‍ തൂങ്ങിയനിലയിലായിരുന്നു സുനില്‍. തറയില്‍ പായയില്‍ മരിച്ചനിലയിലുമായിരുന്നു സുജിനി. മൂന്നുവയസ്സുകാരി മൃതദേഹത്തില്‍ നിന്നും മുലപ്പാല്‍ നുണഞ്ഞ് കരഞ്ഞിരിക്കയായിരുന്നു.
ബുധനാഴ്ച പുലര്‍ച്ചെ അഞ്ചുമണിയോടെ സുനില്‍ ആലഞ്ചേരിയില്‍ താമസിക്കുന്ന അമ്മയെ വിളിച്ച് തനിക്കു സുഖമില്ലെന്നും പെട്ടെന്ന് വീട്ടില്‍ എത്തണമെന്നും ആവശ്യപ്പെട്ടു. സുനിലിന്റെ അമ്മ സുജിനിയുടെ അച്ഛനെ വിവരമറിയിച്ചു. രാവിലെ അദ്ദേഹം വന്ന് വിളിച്ചപ്പോള്‍ വാതില്‍ തുറന്നില്ല. വീട്ടിനുള്ളില്‍നിന്ന് കുഞ്ഞിന്റെ കരച്ചില്‍കേട്ട് സമീപത്തെ വീട്ടില്‍നിന്ന് വെട്ടുകത്തിവാങ്ങി ജനല്‍പ്പാളി പൊളിച്ച് നോക്കിയപ്പോഴാണ് സുനിലിന്റെയും സുജിനിയുടെയും മൃതദേഹങ്ങള്‍ കണ്ടത്. കുഞ്ഞ് അമ്മയുടെ മുലപ്പാല്‍ കുടിച്ച് കരയുകയായിരുന്നു.
സുജിനിയെ കഴുത്തുഞെരിച്ച് കൊലപ്പെടുത്തിയശേഷം സുനില്‍ ആത്മഹത്യ ചെയ്തതാണെന്ന പ്രാഥമിക നിഗമനത്തിലാണ് പോലീസ്. ഫൊറന്‍സിക് സംഘം സ്ഥലത്തെത്തി പരിശോധന നടത്തി. കുടുംബ പ്രശ്‌നങ്ങളാണ് മരണത്തിന് കാരണമെന്ന് പോലീസ് പറയുന്നു. മേസ്തിരി പണിക്കാരനാണ് സുനില്‍. മൃതദേഹം തിരുവനന്തപുരം മെഡിക്കല്‍ കോളേജ് ആസ്പത്രിയില്‍ പോസ്റ്റുമോര്‍ട്ടം നടത്തിയശേഷം ബന്ധുക്കള്‍ക്ക് വിട്ടുനല്‍കി.
