കൊവിഡ്-19 പ്രതിരോധത്തിൻ്റെ ഭാഗമായി പ്രധാനമന്ത്രി നരേന്ദ്ര മോദി പ്രഖ്യാപിച്ച ലോക് ഡൗൺ തുടരുകയാണ്. കർശന നിയന്ത്രണങ്ങളും നിർദേശങ്ങളുമാണ് സർക്കാർ നൽകിയിരിക്കുന്നത്. എന്നാൽ രാജ്യത്ത് കൊറോണ വൈറസ് ബാധ കൂടുതൽ പേരിൽ കണ്ടെത്തിയതും മരണസംഖ്യ ഉയർന്നതും ആശങ്ക പരത്തുന്നു. രാജ്യത്തെ മരണനിരക്ക് 41 ആയി. മഹാരാഷ്‌ട്രയിൽ 10 പേർ മരിച്ചപ്പോൾ തെലങ്കാനയിൽ എട്ട് പേർക്ക് ജീവൻ നഷ്‌ടമായി. ഗുജറാത്തിൽ 6 പേരും മരിച്ചു. കൊവിഡ് സ്ഥിരീകരിച്ചവരുടെ എണ്ണം 1800 കടന്നു. ചൊവ്വാഴ്‌ച മാത്രം 227 കേസുകൾ റിപ്പോർട്ട് ചെയ്‌തു. ഇതിനിടെ കേരളത്തിലെ സാഹചര്യവും ആശങ്കയുണ്ടാക്കുന്നുണ്ട്. കൊവിഡ് ബാാധിതരുടെ എണ്ണം ചൊവ്വാഴ്‌ച കുറഞ്ഞിരുന്നു. എന്നാൽ വരും ദിവസങ്ങൾ സംസ്ഥാനത്തിന് നിർണായകമാണെന്നാണ് ഏറ്റവും പുതിയ റിപ്പോർട്ട്. ഈ ആഴ്‌ച കേരളത്തിന് നിർണായകമാകുന്നത് എന്തുകൊണ്ടാണെന്ന ചോദ്യങ്ങളും ശക്തമാണ്.
കൊവിഡ് ആശങ്കയിൽ തുടരുന്ന കേരളത്തിന് ഒരാഴ്‌ച നിർണായകമാണ്. പ്രധാനമന്ത്രി പ്രഖ്യാപിച്ച ലോക് ഡൗണിന് മുൻപ് വിദേശ രാജ്യങ്ങളിൽ നിന്നെത്തിയവരുടെ ക്വാറൻ്റീൻ കാലാവധി കഴിയുന്ന ആഴ്‌ചയാണിത്. ഭൂരിഭാഗം പേരുടെയും നിരീക്ഷണ കാലാവധി 7ന് അവസാനിക്കും. ഇതിനാൽ ഇവരുടെ പരിശോധനാഫലങ്ങളും റിപ്പോർട്ടുകളും നിർണായകമാണ്. നിരീക്ഷണത്തിൽ കഴിയുന്ന പലരുടെയും ആരോഗ്യനിലയിൽ പുരോഗതിയുണ്ടെന്നാണ് റിപ്പോട്ട്. അങ്ങനെയെങ്കിൽ മികച്ച നേട്ടമാകും ആരോഗ്യവകുപ്പിനും സംസ്ഥാനത്തിനും. എന്നാൽ, ഇവരുമായി ബന്ധപ്പെട്ട കൂടുതൽ വിവരങ്ങൾ പുറത്തുവിടാൻ അധികൃതർ തയ്യാറായിട്ടില്ല.
80 ശതമാനം പേരും വിദേശത്ത് നിന്ന് എത്തിയവർ
സംസ്ഥാനത്ത് കൊവിഡ് ബാധ സ്ഥിരീകരിച്ചവരിൽ 80 ശതമാനം പേരും വിദേശ രാജ്യങ്ങളിൽ നിന്ന് എത്തിയവരാണ്. ദേശീയതലത്തിൽ ലോക്‌ഡൗൺ പ്രഖ്യാപിച്ചത് കഴിഞ്ഞ മാസം 25 മുതലാണെങ്കിലും 22നു തന്നെ രാജ്യാന്തര വിമാന സർവീസുകൾ നിലച്ചിരുന്നു. ഈ കാലയളവിലാണ് ഭൂരിഭാഗം പേരും നാട്ടിലെത്തിയതും നിരീക്ഷണത്തിൽ പ്രവേശിച്ചതും. ഇവരുമായി ബന്ധം പുലർത്തിയവരും നിരീക്ഷണത്തിലാണ്. ഈ ആഴ്‌ചയിൽ ലഭിക്കുന്ന നിർണായക റിപ്പോർട്ടാകും സംസ്ഥാനത്തിന് നേട്ടമാകുക. അതേസമയം, ആശങ്കപ്പെടേണ്ട സാഹചര്യമില്ലെന്ന സൂചനകളാണ് ആരോഗ്യവകുപ്പ് അധികൃതർ നൽകുന്നത്
രോഗം പടർന്നിരിക്കാനുള്ള സാധ്യതകൾ കുറവെന്ന് അധികൃതർ
ലോക് ഡൗണിന് മുൻപേ ഭൂരിഭാഗം പേരും നാട്ടിലെത്തി നിരീക്ഷണത്തിൽ പ്രവേശിച്ചതിനാൽ കൂടുതൽ പേരിലേക്കു രോഗം പടർന്നിരിക്കാനുള്ള സാധ്യത കുറവാണെന്ന് ആരോഗ്യ വിദഗ്ധർ കരുതുന്നു. സമൂഹവ്യാപനം നടന്നിട്ടില്ലെന്ന് അധികൃതർ വ്യക്തമാക്കിയ സാഹചര്യത്തിൽ വരുംദിവസങ്ങളിൽ രോഗികളുടെ എണ്ണം കാര്യമായി കൂടുന്നില്ലെങ്കിൽ കാര്യങ്ങൾ നിയന്ത്രണത്തിലാകുമെന്നാണ് ആരോഗ്യ വിദഗ്‌ധരുടെ വിലയിരുത്തൽ. ഈ സാഹചര്യം നിലനിൽക്കുന്നതിനാൽ ഈ ആഴ്‌ച സംസ്ഥാനത്തിന് അതിനിർണായകമാണ്.
ആശങ്ക ശക്തമാക്കി കാസർകോട്
കാസർകോട് ജില്ലയിൽ വൈറസ് ബാധിതരുടെ എണ്ണം വർധിക്കുന്നതാണ് അധികൃതരെ ആശങ്കപ്പെടുത്തുന്നത്. കഴിഞ്ഞ ദിവസങ്ങളിൽ രോഗം സ്ഥിരീകരിച്ച ആളുകളുടെ പട്ടികയിലും കാസർകോട് ഇടം നേടി. ജില്ലയിലെ സാഹചര്യങ്ങൾ ആശങ്കപ്പെടുത്തുന്നതാണെന്ന് മുഖ്യമന്ത്രി നേരത്തെ വ്യക്തമാക്കിയിരുന്നു. നിരീക്ഷണത്തിൽ കഴിയുന്നവരുടെ റിപ്പോർട്ടുകൾ ആശ്വാസകരമാണെങ്കിൽ സംസ്ഥാനത്തിന് സാഹചര്യങ്ങൾ അനുകൂലമാകും. ലോക് ഡൗൺ നിലനിൽക്കുന്നതിനാൽ കാര്യങ്ങൾ കൂടുതൽ എളുപ്പത്തിൽ കൈകാര്യം ചെയ്യാനും സാധിക്കും.
